Marrëdhëniet SHBA-Kinë janë tensionuar kohët e fundit, me Uashingtonin që akuzoi Pekinin  se po ndihmon Rusinë të arrijë qëllimet e saj në sulmin ndaj Ukrainës.

SHBA ka akuzuar Kinën për shitjen e sistemeve të armëve si dronë.

“Kina nuk mund të pretendojë të jetë plotësisht neutrale në këtë rast, pasi në fakt po zgjedh palët,” i tha Politico ambasadori i SHBA në NATO, Julian Smith.

“Unë mendoj se kur Kina përpiqet të paraqitet si neutrale kur bëhet fjalë për këtë luftë, ne nuk e besojmë,” shtoi ai.

Smith tha gjithashtu se Shtetet e Bashkuara po shohin gjithnjë e më shumë mbështetje armësh nga Kina për Rusinë, duke shtuar se pajisjet kanë luajtur një rol kritik në ndihmën e Moskës për të arritur disa nga qëllimet e saj kundër Ukrainës.

“Nëse ata nuk do të ofronin disa nga këto komponentë, Rusia do të ishte në një situatë shumë të ndryshme dhe do të kishte probleme për të vazhduar disa nga këto akte agresive”, tha ambasadori.

Vërejtjet e Smith erdhën pak përpara se Sekretari i Shtetit i SHBA Anthony Blinken të vizitonte Kinën të mërkurën. Ai pritet të paralajmërojë zyrtarët kinezë kundër ofrimit të ndihmës për Rusinë.

Mjetet ajrore pa pilot (UAV) kanë luajtur një rol të rëndësishëm në luftë për të dyja palët, ndërsa prodhimi masiv i nitrocelulozës në Kinë – një përbërës kyç në prodhimin e barutit – është një shkak për shqetësim.

Por ambasadori amerikan tha se nuk kishte ende prova se Kina po i ofronte “mbështetje vdekjeprurëse” Rusisë, por se po dërgonte pajisje dhe teknologji që mund të përdoreshin si për qëllime civile ashtu edhe për ato ushtarake dhe që po ndihmonte në furnizimin e forcave të saj. Pekini këmbëngul se nuk është një “palë” në luftë dhe mbron atë që i quan “marrëdhënie normale tregtare” me Moskën, ndërsa akuzon SHBA-në për dërgimin aktiv të armëve në Ukrainë.

Leave a Reply

Your email address will not be published. Required fields are marked *