Eksperti i ekonomisë, Ergis Sefa, i ftuar në studion e QUO VADIS në Vizion Plus tha se buxheti i këtij viti ka reflektuar një rritje të fondeve për projekte parandaluese.
Ai deklaroi se fondi për parandalimin e fatkeqësive natyrore është rritur nga 2.9 miliardë lekë në 7.7 miliardë lekë, duke u fokusuar kryesisht në zonat lumore dhe pjesërisht në Durrës.
Sipas tij, qeveria ka siguruar gjithashtu një grant prej 99.3 milionë eurosh nga Bashkimi Europian, nga të cilat 24.6 milionë euro janë të dedikuara posaçërisht për parandalimin e përmbytjeve.
Në lidhje me dëmshpërblimin e banorëve të prekur nga përmbytjet, Sefa bëri të ditur se fondi total i disponueshëm është rreth 25 milionë euro.
Por, siç tha ai, në rast se dëmet i tejkalojnë këto shifra, qeveria do të detyrohet të shkurtojë fonde nga investime të tjera për t’i kaluar te qytetarët e prekur.
Pjesë nga biseda:
Sefa: Sipas tre burimeve kryesore ndërkombëtare, Agjencisë Europiane të Ambientit, BERZH-it dhe Bankës Botërore, për periudhën 2021-2024 janë bërë 3 studime për atë që rajoni ynë përballet, që quhet “gjoba klimatike”. Situta ka dalë me rrezik mbi mesataret, për të mos thënë rrezik i lartë. Po të shohim buxhetin e këtij viti qeveria ka reflektuar edh epse një vit me vonesë. Fondi që ka të bëjë me projektet për parandalimet, ka shkuar nga 2.9 miliardë lekë në 7.7 miliardë lekë
Borakaj: Për projekte konkrete?
Sefa: Për projekte konkrete, kryesisht në zonat lumore dhe pak Durrësin. Normalisht studimi i Berzh-it, i cili, në fakt, dhe i Bankës Botërori quhet fiks “Albania Diagnostics”, ka dalë në 2014. Pra, kemi pasur një vit e gjymë kohë për t’i planifikuar, kemi pasur 3 akte normative ndërkohë me ndyyshimin e buxhetit mund t’i kishim futur në çdo moment, e kemi parë të arsyeshme t’i fusim këtë vit. Gjithashtu, kemi marrë një grant prej 99.3 milionë eurosh nga Bashkimi Europian, ku rreth 24.6 milionë euro janë dedikuar specifikisht për parandalimin e përmbytjeve dhe duhet të përdoren menjëherë.
Borakaj: Sa është fondi i disponueshëm për dëmshpërblimin e banorëve që përmbyten?
Sefa: Në total janë rreth 25 milionë euro. Nëse dëmet e tejkalojnë këtë shumë, qeverisë do t’i duhet të shkurtojë fonde nga investime të tjera për t’i kaluar te banorët, sepse fondet e planifikuara aktualisht janë tejkaluar nga nevojat reale. Raportet ndërkombëtare të vitit 2024 nxjerrin në pah dy problem, ritmin e ngadaltë të reagimit ndaj rrezikut dhe burokracinë e lartë, e cila pengon projektet parandaluese. Ndërkohë, natyra nuk pret leje administrative. Jemi futur në një cikël të ri klimatik që pritet të zgjasë deri në vitin 2048, 2050, ku do të kemi një kombinim të goditjeve sizmike, përmbytjeve të përqendruara dhe zjarreve. Shifrat janë alarmante. Nëse nuk merren masa, parashikohet që brenda 20 viteve dëmi direkt ekonomik të arrijë në 15.7% të Prodhimit të Brendshëm Bruto, që përkthehet në rreth 6 miliardë euro dëm.
/vizionplus.tv
