Pas Bullgarisë, një valë protestash ka përfshirë edhe Rumaninë.
Mijëra qytetarë kanë dalë në sheshe ditët e fundit për të protestuar kundër korrupsionit dhe sistemit të kapur të drejtësisë.
Pakënaqësia qytetare u nxit nga publikimi i një dokumenti nga media investigative Recorder, me dëshmi nga gjyqtarë dhe prokurorë rreth zvarritjes së çështjeve dhe presioneve ndaj magjistratëve.
Protesta nisi fillimisht ditën e mërkurë menjëherë pas publikimit të skandalit, për tu intensifikuar në ditët në vijim.
Të premten në mbrëmje, rumunët dolën në sheshe në shumë qytete të vendit, përfshirë kryeqytetin Bukureshtin, ku u mblodh pjesa më e madhe e tyre.
Në atë që quhet Sheshi i Fitores, demonstruesit brohoritën dhe kërkuan dorëheqjet e zyrtarëve të përfshirë në korrupsion dhe kërkuan një sistem ligjor të drejtë, të pavarur nga presionet e brendshme.
Organizime të tjera janë planifikuar të mbahen këtë të shtunë dhe ditën e dielë.
Rumania renditet si një nga vendet më të prekura nga korrupsioni në BE, ndërsa protesta të ngjashme janë mbajtur edhe në të kaluarën.
Vetëm pak ditë më parë, tubimet masive në Bullgari çuan në rrëzimin e qeverisë.
/vizionplus.tv
