Ish-deputeti Shezai Rrokaj ka deklaruar se e vetmja zgjedhje për krizën politike në vend mbetet krijimi i një qeverie tranzitore.
Në një postim në “Facebook”, Rrokaj duke u ndalur tek audiopërgjimet e publikuara nga prestigjozja gjermane “Bild”, shprehet se shkqlqimi qeverisë po zbehet ashtu si tepsia që I del kallaj.
Rrokaj thekson se me daljen e audiopërgjimeve, demokracia e Shqipërisë është vënë në pikëpyetje.
“Tepsisë i doli shpejt kallaji. Shkëlqimi i ‘Shqipërisë që duam’ po zvenitet dita-ditës, si tepsia së cilës i del kallaji. Droga, korrupsioni, kapja e reformës në drejtësi, mungesa e investimeve të huaja, njëjtësimi i qeverisjes me oligarkët dhe grupet kriminale janë arsye përse qytetarët po largohen dhe përse nuk u çelen negociatat me BE-në as këtë qershor. Përgjimet vërtetuan konstatimet e bëra nga opozita për krimin elektoral, i cili delegjitimon pushtetin e kësaj mazhorance. Demokracia është vënë pikëpyetje. Zgjedhje si këto që po tregojnë përgjimet, për më tepër, pa opozitën nuk mund të ketë. Është e domosdoshme të rithemelohen shtyllat e demokracisë, duke filluar me zgjedhjet e lira dhe ndërtimin e një shteti funksional. Reforma në drejtësi duhet të rikthehet në korrikun e vitit 2016, kur u votua me 140 vota, për të bërë korrektimet e nevojshme dhe për të ngritur institucionet e drejtësisë si dhe për t’i shpallur luftë pa kompromis krimit të organizuar dhe korrupsionit. Një qeveri tranzitore deri në përmbushjen e këtyre objektivave, përfshirë edhe çeljen e negociatave është e vetmja rrugë.”
