Tensionet në Mesdhe janë rritur sërish. Këtë herë ishte ministri turk i Mbrojtjes Hulusi Akar, i cili gjatë një konferencë në Ankara me ambasadorët turq tha se, me lejen e Zotit, nxënësit e shkollave ushtarake turke do të notojnë sërish në ishullin grek te Kastelorizos.
Akar pohoi se Greqia nuk duhet ta mendojë luftën por shpesh ajo ndodh.
HULUSI AKAR
MINISTRI TURK I MBROJTJES
Greqia ka nisur lojën e armatimit, por ne shohim që armët janë të dorës së dytë. Ne i bëjmë thirrje që të përmbahen nga një qasje populiste. Ne u themi grekëve të mos e mendojnë luftën me ne. Lufta është matematikë, ju jeni mjaft të fortë për t’u mbrojtur, por jo për të na sulmuar.
Akar pretendoi se po i përgjigjej një ministri grek, i cili kishte pohuar më herët se Greqia është tepër e fortë për Turqinë.
Por i menjëhershëm ishte edhe reagimi nga pala greke, e cila me anë të zëdhënësit të qeverisë tha se Greqia është vigjilente dhe do të veprojë me maturi në çdo rast për të siguruar paqen në rajon.
YANNIS OIKONOMOU
ZEDHENES I QEVERISE GREKE
Retorikë e ekzagjeruar dhe një ankand sfidash që nuk i shtojnë asgjë më shumë marrëdhënieve greko-turke. Gjithmonë përballë sfidave dhe retorikeve të tilla qeveria greke ka treguar se është e pozicionuar me qetësi dhe vendosmëri.
Ai shtoi se të drejtat kombëtare greke do mbrohen në bazë të traktateve ndërkombëtare dhe se bota e di se Greqia është faktor stabiliteti dhe në anën e së drejtës ndërkombëtare.
Ishull Kastellorizon ndodhet vetëm 2 kilometra larg brigjeve të Turqisë dhe shpesh herë është bërë mollë sherri mes dy vendeve.