Kryeministri Edi Rama ka theksuar seShqipëria ka nevojë për stabilitet në rrugën e saj drejt Europës. Për të, situata e dorëzimit të mandateve nga ana e opozitës është e panjohur.
Gjatë një intervistë që zhvilloi me televizionin italian RAI 2, shefi i qeverisë deklaroi se kjo është një situatë e panjohur.
“Në rrugëtimin drejt Europës kemi nevojë për stabilitet, por 70 deputetë e lanë mandatin. Është një situatë mjaft e panjohur. Nga ajo çfarë kam shfletuar është diçka që ka ndodhur në Italinë e viteve ‘20. Është sikur opozita në Itali të thotë duam një qeveri tjetër se nuk fitojmë ndaj tyre dhe duam zgjedhje të parakohshme”.
Rama në prononcimin e tij për median italiane ka folur edhe në lidhje akuzat për korrupsion, ku ka mohuar se ky fenomen është problem në Shqipëri, por theksoi se po luftohet si asnjëherë më parë.
“Nëse unë do thosha që korrupsioni nuk është problem në Shqipëri do ishte e pavërtetë. Por nëse ju them që korrupsioni po luftohet si asnjëherë më parë mund të verifikohet në raportet e KE-së. I jemi futur një reformë në drejtësi model për të gjithë rajonin. Jemi duke futur në filtër të gjithë magjistratët që duhet të verifikojnë pasuritë e tyre”.
Gjithashtu Rama ka reaguar dhe në lidhje me intervistën që ish-kryeminsitri Sali Berisha kishte dhënë për televizionin italian, ku thoshte se qeveria e ka fituar pushtetin me vota të vjedhura dhe Shqipëria në këto momente është në një revolucion.
Kryeministri në fjalën e tij deklaroi se në lidhje me këto akuza ka renditur tre arsye kryesore.
“Do të doja të thosha tre gjëra. Shqipëria nuk ka 3 milionë, por 4.2 milionë banorë. E dyta mos më pyesni mua, unë nuk jam njeriu i duhur, pyesni agjencitë e specializuara italiane, pyesni Guardia di Finanza nëse nuk kemi bërë një pastrim të kanabisit. Dua t’u them të gjithë italianëve që po na dëgjojnë se kjo është arsyeja pse kam ardhur këtu. Nuk ka asnjë revolucion, nuk ka kaos. Është një revoltë e establishmentit të vjetër dhe lobit që ka humbur, lojërat e drogave, bixhozit që kanë humbur dhe lobeve të tjera që qëndrojnë pas këtyre manifestimeve”.
