Mungesa e ujit të pijshëm në fshatin Cakran të Fierit, ka bërë që dhjetëra banorë të dalin në protestë. Në mungesë të një zyre ku të kërkojnë shërbime, ata vendosën të protestojnë duke bllokuar rrugën duke penguar qarkullimin e mjeteve. Djegia e një pompe dhe mos zëvendësimi i saj, ka lënë pa ujë mbi 10 mijë banorë të ish-komunës Cakran. Edhe pse kanë kaluar 8 muaj nga zgjedhjet vendore, në asnjë ish-komunë të Fierit, nuk janë emëruar administratorët e rinj. Shkak janë mosmarrëveshjet mes PS dhe LSI për numrin e administratorëve. Në këto kushte, zgjidhja e problemeve administrative zvarritet për muaj të tërë. Ujësjellësi i Fierit dhe bashkia ia faturojnë njëri-tjetrit përgjegjësinë, për vendosjen e pompës së ujit.
