Edhe mbrëmjen e kësaj të hëne, pronarët e bizneseve në zonën e “Lungomares” në Vlorë kanë protestuar, duke kërkuar zgjatjen e fashës së lejimit të muzikës deri në orën 24:00.
Ata rrethuan me shirita “skenë krimi”, si dhe me qirinj bizneset e tyre në shenjë revolte.
Në një prononcim për mediat, pronar i një lokali kërkoi gjithashtu heqjen e gardhit policor nga bizneset e tyre.
“Është si punë e armëve kimike që u mblodhën të gjithë pa asnjë lidhje politike. Të hiqet gardhi policor, shiko sa lezet ka sot, ka turizëm. Përveç gardhit policor, është fasha e orarit, të paktën të kalojë deri në orën 02:00. Ora muzikore, ne na u duk sikur na i dha si karamele orën për muzikën deri në 23:00, por faleminderit edhe për atë. Kërkojmë që deri në orën 24:00, brenda rregullave dhe pa ndotje akustike, ne të kemi një sfond muzikor”, u shpreh një biznesmen.
Me protestën e tyre, u solidarizuan edhe disa turistë, të cilët po shijonin shëtitjet buzë detit në Lungomare, ku u shprehën se të dy palët, si qeveria apo bizneset, të reflektojnë, pasi kjo gjë po dëmton turizmin dhe bizneset.
Më herët, gjatë ditës, kryeministri Edi Rama iu përgjigj shqetësimit të biznesve, duke nënvizuar se Lungomare ka një ndotje akustike të tmerrshme, dhe e drejta e bizneseve nuk mund të fitojë mbi të drejtën e atyre që duan zhurmën e detit natën, e jo ndotjen akustike.
