Drejtoria e Gjendjes Civile deklaron se në zgjedhjet e përgjithshme të prillit do të jetë e pamundur që një person të votojë dy herë.
Akuzave se adresat e shumë qytetarëve nuk përputhen me vendbanimet, përfaqesuesi i Gjendjes Civile, Vangjush Stavro, i thirrur nga Komisioni Rregullator i KQZ-së i pergjigjet duke thënë se nuk dëmtohet procesi i votimit.
Sipas Stavros, gjendja civile e rrjedhimisht qendra e votimit nuk ndryshon pavarësisht se adresa e qytetarit nuk përputhet me to. Pra emri i qytetarit ekziston si votues vetëm në një qendër. Një tjetër problematikë e cila pritet të marre zgjidhje në vazhdim, është ajo që lidhet me skadimin e afatit të dokumenteve të identifikimit.
Anëtarët e komisionit rregullator kërkuan që të mos shkohet në masa drastike, por për shkak të kushteve të pandemisë, afati i kartave të identitetit të shtyhet me gjashtë muaj.
