Deputeti shqiptar në Parlamentin e Serbisë, Shaip Kamberi e konsideron të drejtë vendimin e qeverisë së Kosovës për reciprocitetin e targave. Por sipas tij kjo ccështje do të krijojë probleme për qytetarët e Luginës së Preshevës, prandaj kërkon që ata të kompensohen.
SHAIP KAMBERI
DEPUTET NE PARLAMENTIN E SERBISE
“Ajo që për ne është një shqetësim plotësues për banorët e Luginës së Preshevës se besoj që kjo do të ndërlikojë qarkullimin e lirë të njerëzve. Sepse nuk e di sa është e përgatitur ministria kompetente lidhur me procedurat administrative të mos krijimit të tollovive në kufi. Përndryshe unë shpresoj që do të mbahet premtimi publik që do të kompensohen qytetarët e Luginës së Preshevës, të gjitha pagesat që bëhen në emër të kësaj mase”.
Kamberi shton më tej se ndërkombëtarët duhet tia bëjnë të qartë Serbisë se nuk mund të vazhdojë të shkelë marrëveshjet për të cilat bie dakort.
“Cështja e tabelave përmendet si një shkelje të cilën Serbia në vazhdimësi po e bën, në Raportin e Progresit të vitit 2020. Meqenëse Serbia nuk ka në këta nëntë muajt e këtij viti, asnjë kapitull të hapur të integrimit në BE, kjo flet qartë se ajo po i shmanget rrugës evropiane. Duhet të ketë një reagim të Bashkimit Evropian në radhë të parë, që është ndërmjetësues i këtyre marrëveshjeve. Nuk ka kuptim të arrihen marrëveshjet në Bruksel edhe ato marrëveshje nga njëra palë të mos respektohen”.
Reagimi i serbëve në veri, sipas Shaip Kamberit, ka qenë i pritur, pasi prej vitesh ata njihen si një pakicë e privilegjuar nga presidenti serb, të cilit tani i intereson të bëjë zhurmë, përpara zgjedhjeve presidenciale.
“Nuk besoj që Serbia do të ketë komoditetin e tillë që të krijoj destabilizim më të madh të gjendjes. Destabilizimi do të shkoj në aspektin verbal, për arsye se presidentit Vuçiqit dhe në përgjithësi nomenklaturës qeveritare këtu në prag të mbajtjes së zgjedhjeve presidenciale në vitin e ardhshëm ndoshta edhe parlamentare, i konvenon një ashpërsim i retorikës karshi Kosovës. Prandaj ajo që mund të pritet një destabilizim më tepër i aspektit verbal, por për të cilën ne jemi mësuar në vazhdimësi të kemi në raport me Beogradin”.
Vendimi për targat e përkohëshme është reciprok pasi Serbia prej 10 vitesh tashmë, e zbaton një masë të tillë në pikat kufitare me Kosovën.
