Policia e Himarës dhe ajo Kufitare e Dhërmiut ndërhynë me sukses për të shpëtuar një shtetas amerikan që kishte mbetur i bllokuar në një zonë të thepisur pranë plazhit të njohur të Akuariumit.
Ngjarja ndodhi ditën e djeshme, kur Salla Operative mori një njoftim për një turist që kishte pësuar dëmtime në këmbë gjatë eksplorimit të terrenit të vështirë dhe nuk ishte në gjendje të lëvizte.
Në reagim të menjëhershëm, forcat e Komisariatit të Policisë Himarë, në bashkëpunim me Policinë Kufitare të Dhërmiut, organizuan një operacion shpëtimi. Turisti u lokalizua dhe u nxor nga zona ku ishte bllokuar me ndihmën e një mjeti lundrues gomone. Më pas, ai u transportua në Spitalin e Himarës, ku ndodhet jashtë rrezikut për jetën.
Shtetasi amerikan ka shprehur mirënjohje për reagimin e shpejtë dhe profesionalizmin e strukturave të Policisë.
/vizionplus.tv
