Zyrtarizimi i listave për kandidatë të Partisë Demokratike për qarkun Vlorë ka shkaktuar përplasje brenda selisë blu.
Drejtuesi i qarkut, Bujar Leskaj ka shfaqur pakënaqesi lidhur me 17 emrat e kandidatëve për deputetë në zgjedhjet parlamentare të 25 prillit. Sipas tij, drejtuesit lokal të PD, përfshirë kreun e saj, Genc Deromemaj, janë lënë në fund të listës ose nuk janë përfshirë fare. Për pasojë, nuk përjashtohet mundësia që Leskaj të japë dorëheqjen.
Vizion Plus është interesuar pranë KQZ, institucion i cili sqaroi se nuk është depozituar asnjë dokument dorëheqjeje.
Ndërkohë, burime pranë PD bëjnë të ditur se Leskaj ka pasur kritika për listat, por jo dorëheqje.
Gjithashtu, pakënaqesi ka shfaqur dhe Genc Deromemaj, kryetar i degës së PD në Vlorë. Ky i fundit ishte propozuar nga ana e Leskajt për t’u përfshirë në listën emërore të kandidatëve për deputetë, por nuk u përzgjodh nga lideri demokrat Lulzim Basha.
I gjithë debati mbi listën e vendosur nga Basha dhe organet e drejtësisë së selisë blu është zhvilluar në një mbledhje të tensionuar, ku nga Tirana kishte shkuar në Vlorë “për të qetësuar gjakrat” edhe ish-zv.drejtori i Përgjithshëm i Policisë së Shtetit, Agron Kuliçaj.
