“Pas Thethit, radha e kujt?”
Kjo ishte tema e mbrëmjes së sotme në emisionin “Quo Vadis” në Vizion Plus nën moderimin e Pranvera Borakajt.
Thethi është në qendër të vëmendjes ditët e fundit, kësaj radhe jo për turizmin dhe bukuritë natyre, por për prishjen e ndërtimeve pa leje. Aksioni ka nisur prej disa ditësh dhe prishja e ndërtimeve pa leje ka sjellë përplasjen e banorëve me zyrtarët e IKMT-së dhe forcat e policisë.
Avokati dhe aktivisti Sevin Serjani, i ftuar në studio tha se shteti, i cili ka lejuar këto ndërtime pa leje, nuk ka funksionuar si duhet.
Serjani: Ka dy mundësi; ose nuk ka funksionuar shteti, ose nuk funksionon. Nëse ke toleruar, do të thotë që shteti nuk ka funksionuar. Kjo e ka çuar shtetin në një pashtetësi në mënyrën e funksionimit. Ajo që ndeshim sot, sidomos pas 11 majit, është një element i cili është për të vënë duart në kokë. Kryeministri Rama, jo vetëm për rastin e Thethit, por me marrjen e kompetencave që s’i takojnë, sillet sot duke thënë “unë jam ligji”. Janë lejuar ndërtimet pa leje, shteti nuk ka funksionuar. Kemi pasur raste kur njerëzit kanë tentuar të rregullojnë gjëra të vogla në shtëpi dhe janë marrë zvarrë nga policia. Jo më të bësh ndërtime. Pra paligjshmëria fillon dhe mbaron te shteti. Sistemi ynë dhe kushtetuta jonë është e bazuar në ligje dhe ne funksionojmë në bazë të proceduarave. Në momentin e parë që tolerojmë ose mos tolerojmë, atëherë çdo ligj bëhet thuajse inekzistent./vizionplus.tv
