Partia Demokratike reagoi zyrtarisht pas nisjes së punës nga SPAK pas betimit të anëtarëve të saj në Presidencë.
Selia blu tha se përshendet fillimin e punës së SPAK-ut dhe mbështet funksionimin e pavarur të kësaj strukture.
Fillimi menjëherë nga puna dhe ndëshkimi i krimit të organizuar dhe korrupsionit, shton PD, duhet të bëhet në mënyrë profesionale, të paanshme dhe të vendosur.
Partia Demokratike, e cila ka miratuar ligjin për ngritjen e SPAK dhe të Byrosë Kombëtare të Hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture, pavarësisht vendimeve të disa prej tyre, në të shkuarën.
Është koha, shton në një deklaratë për mediat PD, që prokurorët të ngrihen në lartësinë e detyrës dhe të përmbushin pritshmërinë e qytetarëve shqiptarë për t’i dhënë fund pandëshkueshmërisë së krimit të organizuar, promovuesve të kriminelëve në politikë dhe zyrtarëve të korruptuar.
Shqipëria ka një shans të ri dhe real për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare, tek politikanët dhe zyrtarët e lartë. Partia Demokratike falenderon Shtetet e Bashkuara të Amerikës për ndihmën e dhënë deri më tani për bërjen funksionale të SPAK dhe për gatishmërinë e treguar për të vijuar mbështetjen për funksionimin e pavarur të SPAK.
Prokuroria e Posaçmë është një investim i madh në kuadër të reformës në drejtësi, me mbështetjen edhe të SHBA dhe BE-së.
