Partia Demokratike në  një deklaratë të përbashkët të koalicionit opozitar, deklaroi sot se, partitë opozitare vendosën të mos rregjistrohen si subjekte zgjedhore në KQZ, pa një qeverie teknike me mbështetje të gjerë politike.

 

Në deklaratë, thuhet se “Partitë e koalicionit opozitar duke shqyrtuar krizën e thellë politike ku ndodhet Shqipëria, kërcënimin e zgjedhjeve nga krimi i veshur me pushtet, konfirmojnë njëzëri vendimin e shpallur me 18 shkurt: se zgjidhja e vetme që garanton zgjedhje të lira dhe të ndershme është krijimi i një qeverie teknike me mbështetje të gjerë politike”.

 

“Duke marrë në konsideratë raportet e fundit ndërkombëtare si ai i Departamentit Amerikan të Shtetit dhe i EUROPOL, ku Shqipëria kryeson listën europiane për prodhimin e trafikimin e drogës dhe pastrimin e parave, është e qartë se shqiptarët ndodhen në kushtet e asgjesimit të zgjedhjeve të lira nga krimi i organizuar dhe paratë e drogës me lidhje qeveritare. Në këto kushte, partitë e koalicionit opozitar konfirmojnë unanimisht vendimin për mosparaqitjen e kërkesës për regjistrim si subjekte zgjedhore në KQZ deri në arritjen e një marrëveshje politike për krijimin e qeverisë teknike me mbështetje të gjerë”, theksohet në deklaratë e Partise Demokratike.

 

Në emër të koalicionit opozitar, PD shprehet se “Partitë aleate të koalicionit opozitar përshëndesin dhe falenderojnë me mirënjohje qytetarët shqiptarë që i janë bashkuar kësaj lëvizje popullore për zgjedhje të lira dhe të ndershme dhe bëjnë thirrje për një mobilizim të të gjitha energjive, dhe qëndresë të vendosur, deri në fitoren e kauzës për zgjedhje të lira e të ndershme”.

Leave a Reply

Your email address will not be published. Required fields are marked *