Besimtarët ortodoksë festojnë këtë të dielë Pashkët. Me lutje për paqe, ata ndoqën meshën e Ngjalljes së Krishtit në kisha e katedrale në gjithë vendin. Kremtimi kulmoi afro mesnates ku u shpërnda drita për besimtarët.
Në Tiranë, mesha e shenjtë u mbajt në Katedralen “Ngjallja e Krishtit”, nën drejtimin e Kryepeshkopit Joan. Mijëra besimtarë morën pjesë në ceremoninë solemne, duke ndezur qirinj dhe përcjellë mesazhe shprese, paqeje dhe besimi.
Kryepiskopi i Tiranës, Durrësit dhe gjithë Shqipërisë, Joan Pelushi, uroi të gjithë besimtarët të gjejnë paqe në zemrat e tyre.
Joan Pelushi, Kryepiskopi i Tiranës, Durrësit dhe gjithë Shqipërisë: Le t’i përgjigjemi, pra, thirrjes: “Paqe në ju” me të gjithë jetën tonë. Le të bëhemi ne vetë paqebërës në një botë që po shkatërrohet nga urrejtja, nga lakmia dhe egoizmi. Por, që të bëhemi paqebërës, fillimisht duhet të kemi paqe brenda nesh. Bëni paqe në zemrën tua.
Ai e cilësoi këtë festë si thirrje për dashuri, falje dhe bashkim mes njerëzve.
Joan Pelushi, Kryepiskopi i Tiranës, Durrësit dhe gjithë Shqipërisë:“Çfarë i vlen njeriut të fitojë gjithë botën – na thotë Krishti – nëse humb shpirtin e tij?” këto fjalë janë më aktuale se kurrë. Jetojmë në një epokë ku njeriu ndjek pa pushim të mirat materiale, sigurinë, statusin shoqëror, dhe megjithatë ndihet më i zbrazur, më i vetmuar, i paplotësuar, më i shqetësuar se kurrë. Ndërsa Ngjallja na zbulon një të vërtetë të madhe: kush ka Krishtin në zemrën e tij, nuk i mungon asgjë.
Atmosfera e kësaj nate të veçantë u shoqërua me lutje, ndërsa kambanat shpallën Ngjalljen.
Pas meshës, besimtarët u larguan me qirinj të ndezur në duar, simbol i dritës së shpresës që e çojnë në familjet e tyre. Sipas traditës biblike, pashka shënon trimfin e jetës ndaj vdekjes, përmes Jezu Krishtit.
