Vetëm pak orë pasi përfunduan bisedimet triditore mes delegacioneve të Shteteve të Bashkuara dhe Ukrainës në Florida, Rusia nuk ka kursyer sulmet. Por fatmirësisht, deri më tani nuk raportohet për viktima.
Bisedimet triditore nuk patën përparime të mëdha.
Mediat amerikane bëjnë me dije se diskutimet ishin të vështira dhe pjesa më e ndërlikuar ishte ajo që ka të bëjë me çështjet territoriale.
Rusia kërkon që Ukraina të tërhiqet nga disa zona të Donbasit që aktualisht kontrollon, ndërsa SHBA-të po përpiqen të prodhojnë ide të reja që mund të afrojnë palët.
Presidenti ukrainas, Volodimir Zelenski, konfirmoi se bisedimet u mbyllën me një telefonatë dy-orëshe mes tij, të dërguarit amerikan Stiven Uitkof dhe Xhered Kushnerit. Në këtë telefonatë morën pjesë edhe negociatorët ukrainas Rustem Umerov dhe Andri Hatov.
Zelenski e përshkroi bisedën si “të gjatë dhe thelbësore”, duke thënë se u trajtuan pikat që mund të çojnë drejt ndalimit të gjakderdhjes, dhe se Ukraina mbetet e angazhuar të punojë me SHBA-të “në mirëbesim” për arritjen e një paqeje të vërtetë.
Nga ana tjetër, shefi i Kremlinit, Vladimir Putin, ka përsëritur se Rusia synon të marrë Donbasin “me çdo mjet”, duke nxjerrë edhe më shumë në pah mosmarrëveshjet.
Ekipi negociator i Ukrainës pritet të kthehet të hënën në Evropë dhe t’i raportojë drejtpërdrejt Zelenskit në Londër mbi propozimet më të fundit amerikane.
Presidenti ukrainas do të vizitojë Downing Street nesër për një takim ballë për ballë me Keir Starmer, Emmanuel Macron dhe Friedrich Merz, në një shenjë mbështetjeje për Kievin.
Starmer do ta shfrytëzojë takimin me udhëheqësit nga Ukraina, Franca dhe Gjermania për të diskutuar bisedimet e vazhdueshme midis zyrtarëve amerikanë dhe ukrainas, që synojnë gjetjen e një marrëveshjeje mbi garantimin e sigurisë së Ukrainës pas luftës.
/vizionplus.tv
