Dhënia e çmimit Nobel në Letërsi austriakut Peter Handke, një mohues i gjenocidit në Kosovë dhe lidhjet e tij Sllobodan Millosheviçin, vijojnë të shkaktojnë reagime të shumta. Vala e kritikave e ka detyruar Akademinë Suedeze të japë shpjegime për këtë vendim.
Sekretari i Akademisë Suedeze, Mats Malm, tha për “The Nju York Times” se “nuk është në mandatin e akademisë që të balancojë kualitetin letrar në raport me qëndrimet politike”. Ndërsa në një reagim për “CNN”, “Fondacioni Nobel” përgjigjet shkurt:
“Asnjëherë nuk i komentojmë përzgjedhjet e pavaruara të cilat jepen nga institucionet të cilat zgjedhin laureatët për Çmime Nobel” .
Shkrimtari austriak Peter Handke, njihet si një adhurues i Sllobodan Millosheviçit i dënuar për krime lufte. Ai madje ka marrë pjesë në ceremoninë e varrimit të njeriut që njihet ndryshe si “kasapi i Ballkanit”.
Menjëherë pas vlerësimit të shkrimtarit Handke, Akademitë e Shkencave në Tiranë dhe në Prishtinë kritikuan vendimin, duke kërkuar anulimin e çmimit Nobel për të.
Vetë autori austriak ka preferuar të heshtë përballë këtij lumi kritikash. Ndërkohë në platformat online kanë nisur disa peticione të ndryshme që synojnë mbledhjen e mijëra firmave me qëllim për t’i kërkuar akademisë suedeze heqjen e çmimit.