Ka nisur këtë të shtunë mbledhja e Asamblesë Kombëtare të Partisë Socialiste te “Mélia” në Gjirin e Lalëzit, ku fjalën hapëse e mbajti Sekretari i Përgjithshëm, Blendi Klosi. Në fjalën e tij, Klosi theksoi se nën drejtimin e Edi Ramës, Partia Socialiste paraqitet sot më e fortë, më e organizuar dhe më fituese se kurrë më parë.
Ai u ndal te fitorja e mandatit të katërt qeverisës, duke e cilësuar atë si një “provë të jashtëzakonshme besimi” nga qytetarët shqiptarë, të cilët, sipas tij, kanë zgjedhur stabilitetin dhe vazhdimësinë në qeverisje.
Lexo edhe :
Klosi theksoi se ky mandat kërkon më shumë përgjegjësi nga Partia Socialiste, ndërsa solli edhe një krahasim me zgjedhjet e vitit 2021, duke nënvizuar rritjen e mbështetjes elektorale për PS-në dhe dobësimin e opozitës.
Ai shtoi se kjo fitore nuk erdhi si rezultat i dobësimit të kundërshtarëve, por falë unitetit dhe organizimit të brendshëm të Partisë Socialiste.
Klosi: PS nën drejtimin e Edi Ramës vjen sot në vitin e saj të 35-të më e fortë se kurrë, më fituese se kurrë dhe më e organizuar se kurrë më parë. Jemi mbledhur sot pas rikonfirmimit nga vota e shqiptarëve për herë të katërt si forcë qeverisëse e vendit. Çdo anëtar i këtij formuni dhe çdo socialist i thjeshtë, anëtar i PS do duhet të jetë krenar që është pjesë e fitores së mandatit të katër qeverisës. Fitorja jonë nuk është e zakonshme por një provë besimi e jashtëzakonshme, një mesazh që shqiptarët kanë zgjedhur stabilitetin, seriozitetin e qeverisjes dhe drejtimin politik të vendit nga Edi Rama.
Pikërisht sepse është mandati i katërt, kjo kërkon më shumë përgjegjësi, një parti që fiton katër herë, nuk mund të sillet si një parti që fiton për herë të parë. Krahasimi me 2021, PS forcohet, opozita dobësohet. Krahasimi me vitin 2021 është provë e fortë e cilësisë së fitores tonë. Brenda vendit PS rritet nga 48.7% në 53 %. Pra jo vetëm fiton, por zgjeron peshën e saj politike. Kjo do të thotë se ne nuk kemi fituar sepse opzoita ka rënë, por kemi fituar sepse kemi ditur të qëndrojmë të bashkuar./vizionplus.tv
