Policia e Vlorës ka zhvilluar kontrolle në të gjithë territorin e qarkut për të parandaluar dhe evidentuar rastet e ndotjes akustike, veçanërisht në zonat turistike.
Gjatë një inspektimi, në një beach bar në Dhërmi, konstatuan se niveli i muzikës ishte mbi normat e lejuara me ligj.
Si rezultat, ndaj administratorit të subjektit, u vendos një masë administrative në vlerën e 200 000 lekëve.
NJOFTIMI:
Në kuadër të masave të shtuara për ruajtjen e qetësisë publike dhe për mbrojtjen nga ndotja akustike në zonat turistike, strukturat e DVP Vlorë kanë intensifikuar në gjithë qarkun, monitorimet në subjektet që zhvillojnë veprimtari me muzikë të lartë.
Shërbimet e Stacionit të Policisë Dhërmi, më datë 26.07.2025, gjatë kontrollit të ushtruar në një beach bar, në Dhërmi, konstatuan se niveli i muzikës i tejkalonte kufijtë e lejuar me ligj. Në përfundim, ndaj administratorit të këtij subjekti, shtetasit E. P., u vendos masë administrative me vlerë 200 000 lekë.
Drejtoria Vendore e Policisë Vlorë i bën thirrje të gjithë personave fizikë dhe juridikë që të respektojnë nivelin dhe orarin e lejuar për muzikën që gjenerojnë nga aktivitetet në subjektet e tyre.
