Vetëm një javë përpara finales së madhe të 15 qershorit, Ferma VIP 3 ka hyrë zyrtarisht në fazën më vendimtare të garës. Nata e 22-të në ekranin e Vizion Plus solli emocione të forta, surpriza prekëse, debate dhe vendime që ndryshojnë rrjedhën e lojës.
Momenti më i rëndësishëm i mbrëmjes ishte shpallja e finalistes së parë. Në përballjen e shumëpritur me Romirin, publiku vendosi t’i besojë një vend në finalen e madhe poetes Mimoza Ahmeti. Mes emocionesh, Moza falënderoi publikun për mbështetjen, duke siguruar e para biletën drejt natës finale.
Ndërkohë, gara u bë edhe më e fortë me eliminimin e radhës. Modelja Klevisa Gega u detyrua të lërë përfundimisht fermën, pasi humbi televotimin që pasoi sfidën e mbrëmjes. Kështu, rrugëtimi i saj në reality show përfundoi vetëm pak ditë para fundit të garës.
Por ajo që e bëri këtë spektakël të veçantë ishte mënyra e pazakontë për përzgjedhjen e kandidatëve për finalistin e dytë. Për herë të parë në historinë e formatit, ishin pikërisht kafshët e fermës që morën në dorë fatin e banorëve. Dy dele, të drejtuara drejt tasave ku ndodheshin fotografitë e fermerëve, përcaktuan emrat që do të shkonin në televotim.
Pas një momenti sa interesant aq edhe të paparashikueshëm, në televotim përfunduan Elvis Pupa, DJ Bujaka dhe Ilir Shaqiri. Tashmë publiku do të vendosë se cili prej tyre do të bëhet finalisti i dytë i këtij edicioni.
Në fermë nuk munguan as tensionet. Një tjetër përplasje mes Ilir Shaqirit dhe Elvis Pupës tregoi se nervat janë në kufijtë e tyre, ndërsa afrimi i finales po i bën raportet mes fermerëve gjithnjë e më të nderlikuara.
Krahas garës, mbrëmja solli edhe momente prekëse. Sara Karaj u surprizua nga gjyshërit e saj, të cilët ndanë kujtime, këshilla dhe emocione me mbesën e tyre.
Emocione përjetoi edhe Elvis Pupa, i cili festoi 49-vjetorin e lindjes brenda fermës. Përveç urimeve nga fermerët, ai mori një mesazh surprizë nga mësuesja e klasës së parë, duke rikthyer kujtime të veçanta nga fëmijëria dhe rrugëtimi i tij i jetës.
Me një finaliste tashmë të konfirmuar, një tjetër që pritet të zgjidhet nga publiku dhe me tensionet që rriten nga dita në ditë, Ferma VIP 3 po hyn në javën vendimtare të këtij edicioni.
