Ministri i Jashtëm i Turqisë Mevlut Cavusoglu mbërriti në Greqi të dielën, ndërsa dy vendet anëtare të NATO-s përpiqen të zbusin marrëdhëniet e tensionuara nga një sërë mosmarrëveshjesh, përfshirë mbi të drejtat për kërkime për energji në Mesdheun Lindor.

Ndalesa e parë e Cavusoglu ishte rajoni verilindor i Trakës, pranë kufirit turk, ku ai do të takohej me anëtarë të komunitetit mysliman.

Greqia e njeh komunitetin si pakicë fetare por Turqia i referohet asaj si pakicë etnike turke.

Kjo pjesë private e udhëtimit vjen një ditë përpara vizitës zyrtare të Cavusoglu në Athinë ku ai është planifikuar të takohet me homologun grek Nikos Dendias.

Greqia dhe Turqia kanë pasur mosmarrëveshje prej dekadash për një numër çështjesh, përfshirë të drejtat territoriale në Egje, kufijtë detarë dhe ajrorë dhe të drejtat e pakicave.

Pas përshkallëzimit të tensioneve vitin e kaluar, dy vendet janë përpjekur të përmirësojnë gradualisht lidhjet dhe Dendias vizitoi Turqinë në mes të prillit për bisedime me homologun turk.

Por një konferencë e përbashkët për shtyp pas atij takimi u kthye në një shkëmbim të rrallë publik akuzash me replika dhe shprehje pakënaqësish./ VOA

Leave a Reply

Your email address will not be published. Required fields are marked *