I ftuar në emisionin “Dritare” të gazetares Rudinën, në Vizion Plus, Ministri i Jashtëm Ditmir Bushati ka komentuar vizitat e tij në SHBA, ku ka përsëritur dy mesazhet që u përcollën nga këto takime.
“Mesazhi parë ishte përfundimi sa më parë i reformës në drejtësi, që ashtu si BE kërkojnë fillimin e zbatimit të reformës. Mesazhi i dytë ishte pjesëmarrja e gjithë aktorëve politikë në zgjedhjet e 18 qershorit dhe sigurimin e zgjedhjeve të lira”, u shpreh Bushati.
Ministri foli edhe për samitin në Bruksel që do të zhvillohet në fund të majit, ku sipas është një mundësi e mirë për vendosjen e kontakteve dhe zhvillimin e takimeve.
“Për pak javë do të shkojmë në një samit, që zhvillohet në Bruksel. Është herët të flitet për samitin dypalësh dhe takimin Rama- Trump. Por ky samit do të jetë një mundësi e mirë për takime me zyrtarë të tjerë”, u shpreh Bushati.
Zgjedhjet në Francë
Bushati tha se shpreson që Franca të kthehet në bashkëdrejtimin e BE, duke theksuar se Emmanuel Macron shihet si jë ditë shprese.
“Nuk kam qenë indiferent ndaj fushatës, meritojnë një lexim shumë të thelluar. Shpresoj që të kemi një rikthim të Francës në bashkë drejtimin e BE. Ka shumë vende që e kërkojnë këtë. Macron konsiderohet si zëri i shpresës me programin që ka paraqitur. Ndërsa një tërësi vendesh të BE janë kundër programit të Marine Le Pen”, u shpreh Bushati në Dritare.
Franca zhvilloi të dielën fazën e parë e zgjedhjeve, ku Le Pen dhe Macron shkuan në balotazh. Në 7 maj pritet raundi i radhës, prej nga do të zgjidhet presidenti i ardhshëm i Francës, ku përballë janë dy kandidatë të kundërt, njëri pro BE dhe tjetri kundër BE.
