Presidenti Ilir Meta kujton dëshmorin e atdheut Arben Zylyftarin, i cili ra në krye të detyrës 20 vite, në një aksion për arrestimin e Bahri Tafilit, i cili mbeti gjithashtu i vrarë.
Në një postim në “Facebook”, kreu i shtetit shprehet se gjaku i dëshmorëve të atdheut nuk do të bëhet kurrë ujë, teksa shtoi se lufta ndaj drogës dhe banditëve të lidhur me politikën duhet të vazhdojë për të cuar Shqipërinë drejt rrugës europiane.
“Sot nderojmë me vlerësim, mirënjohje e respekt të thellë kujtimin, veprën dhe sakrificën sublime të Dëshmorit të Atdheut, Kolonel Arben Zylyftarit, i cili ra në krye të detyrës 20 vite më parë në luftë me krimin. Dita e sotme na risjell në vëmendje qindra Dëshmorë të Policisë së Shtetit, që të udhëhequr nga ndershmëria, përkushtimi dhe përgjegjësia e lartë qytetare e shtetërore, sakrifikuan jetën e tyre për mbrojtjen e rendit, qetësisë e sigurisë publike, por edhe të vlerave e parimeve që duhet të udhëheqin cilindo që mban veshur uniformën e shtetit.”
Meta shkruan mes të tjerash se është me rëndësi jetike që Policia e Shtetit të jetë shembulli i respektimit të ligjit për t’u shërbyer me nder, përkushtim e dinjitet qytetarëve, duke u distancuar nga lidhjet me krimin, politikën dhe praktikat arbitrare.
“Lufta kundër drogës dhe banditëve të lidhur me politikën është kusht thelbësor për integrimin europian, dhe çdo neglizhencë do të ketë pasoja tepër të rënda për të ardhmen e vendit! Gjaku i Dëshmorëve të Atdheut, nuk do të bëhet ujë dhe mbarë populli shqiptar do t’i kujtojë përherë me krenari e respekt Heronjtë e tij!”
