Ndërsa Shqipëria po përjeton një bum në turizëm, e gjithë vëmendja është te menaxhimi sa më i mirë i këtij sezoni veror.
Herida Duro nga Drejtoria e Zhvillimit të Turizmit, në një lidhje të drejtëpërdrejtë në edicionin qendror të lajmeve në Vizion Plus me moderator Roland Zilin, tha se institucionet përgjegjëse janë angazhuar në përmirësimin e kushteve dhe ruajtjen e qetësisë në zonat bregdetare.
Znj. Duro nënvizoi se këtë vit ka një rritje të hapësirave publike, teksa shtoi se sfidat kryesore mbeten pastërtia dhe ndotja akustike.
Herida Duro deklaroi se autoritetet kanë vendosur masa shtesë monitorimi dhe ndëshkimi, në kuadër të një plani të gjerë operativ që synon garantimin e standardeve të duhura në zonat bregdetare.
Intervista e plotë:
Si po ecën menaxhimi i hapësirave publike që këtë vit janë më të shumta se një vit më parë?
Duro: Kemi një rritje të hapësirave publike që kanë akses të lirë, pa pagesë. Janë mobilizuar që të kenë sinjalistikën e duhur, por mbi të gjitha të kenë një pastërti dhe të sigurojnë një qetësi për të gjithë pushuesit.
Një tjetër sfidë mbetet pastërtia, ku jemi këtë vit me mjedisin e pastër?
Duro: Përveç detyrimit ligjor që bashkitë kanë për të pastruar territoret e tyre, kanë një forcë të shtuar për të katërtin vit radhazi nga Agjencia e Bregdetit dhe Ministria e Turizmit. Me operatorë të shtuar, të dedikuar në 24 orë. Jemi në një plan operacional të vazhdueshëm, 24 orë në 24 orë, ku trupa dhe pastrimi po ndodhen në të gjitha zonat ku evidentohen apo raportohen situata që kanë ngarkesë më të shtuar si pasojë edhe të fluksit.
Shpesh herë kemi vënë re qytetarë të papërgjegjshëm, por edhe biznese të papërgjegjshme që nuk kujdesen për mjedisin. Mos ka ardhur koha të shtohet ndëshkimi për këta subjekte apo njerëz?
Duro: Me planin e masave për një menaxhim më të mirë, edhe ndërgjegjësimi është një nga objektivat kryesorë. Tashmë në terren monitorohen në mënyrë të vazhdueshme të gjitha rastet kur ka shkelje apo tentohen të thyen rregullat e përgjegjshëm për një qytetari dhe respekt të komunitetit ku ne jetojmë. Vetë ministrja Kumbaro ka qenë prezente në të gjitha qytetet bregdetare, duke ngritur zërin dhe duke tërhequr vëmendjen për një ndërgjegjësim. Të jemi të gjithë bashkë dhe të mundemi të kemi një rezultat të përbashkët të mirë. Vetëm kështu mund të arrijmë atë që plazhet tona meritojnë të kenë në prezantimin e tyre.
Cili është një problem që po vijon dhe ende nuk është zgjidhur? Kush është problemi kryesor sipas jush?
Duro: Pastërtia e parë, por edhe zhurmat apo ndotja akustike, që është një tjetër shqetësim. Për herë të parë, policët janë të siguruar edhe me mjetet e duhura për të matur ndotjen akustike që vjen si pasojë e zhurmave që ndodhin nëpër plazhe apo restorante. Ka edhe masa ndëshkuese, patjetër.
/vizionplus.tv
