Shtetet e Bashkuara do të heqin dorë nga përpjekjet për të ndërmjetësuar një marrëveshje paqeje Rusi-Ukrainë brenda disa ditësh, nëse nuk ka shenja të qarta që mund të arrihet një armëpushim, ka paralajmëruar Sekretari amerikan i Shtetit, Marco Rubio, raporton BBC.
“Ne nuk do të vazhdojmë me këtë përpjekje për javë dhe muaj me radhë,” tha Rubio, duke shtuar se SHBA kishte “prioritete të tjera për t’u fokusuar”.
Lexo edhe :
Related Posts
Rusia nisi një pushtim të plotë të Ukrainës në vitin 2022 dhe ka vendosur një sërë kushtesh për çdo armëpushim të mundshëm.
Pavarësisht besimit fillestar të administratës Trump se mund të siguronte një marrëveshje shpejt, përpjekjet për të arritur një armëpushim të plotë ende nuk janë materializuar, me Uashingtonin që fajëson të dyja palët.
Pas një takimi me liderët evropianë në Paris për një armëpushim të mundshëm, Rubio u tha gazetarëve të premten: “Ne duhet të përcaktojmë shumë shpejt tani , dhe unë po flas për disa ditë, nëse kjo është e mundur apo jo”.
“Nëse nuk do të ndodhë, atëherë ne thjesht do të vazhdojmë përpara,” tha ai për bisedimet e armëpushimit.
Ai tha se ishte e qartë se një marrëveshje paqeje do të ishte e vështirë për t’u arritur, por duhet të kishte shenja se mund të arrihet së shpejti.
Presidenti amerikan Donald Trump kishte thënë para se të rikthehej në detyrë se do të ndalonte luftimet në 24 orët e para të presidencës së tij.
Zëdhënësi i Kremlinit, Dmitry Peskov, tha se “negociatat që po zhvillohen janë mjaft të vështira”.
“Pala ruse po përpiqet të arrijë një zgjidhje paqeje në këtë konflikt, të sigurojë interesat e veta dhe është e hapur për dialog”, tha ai.
Komentet vijnë pasi sulmet ruse në Ukrainë vazhdojnë. Të premten, presidenti ukrainas Volodymyr Zelensky tha në një postim në X se Rusia kishte nisur një breshëri sulmesh me raketa që vranë dy persona.
Gjatë një takimi me kryeministren italiane Giorgia Meloni në Romë të premten, nënpresidenti i SHBA JD Vance tha se ishte “optimist” për përfundimin e luftës në Ukrainë.
“Ne ndihemi optimistë se mund të shpresojmë që të mbyllim këtë luftë, këtë luftë shumë brutale.”/vizionplus.tv
