Ministri i Brendshëm, Sandër Lleshaj ka zhvilluar një takim me homologun maqedonase Oliver Spasovksi këtë të martë në qytetin e Pogradecit, një takim i zhvilluar për thellimin dhe përmirësimin e mëtejshëm të bashkëpunimit ndërkufitar dhe policor.
Ministri Lleshaj në këtë takim ka përgëzuar homologun e tij, për rezultatet në parlamentin e Maqedonisë për sa i përket aprovimit të Marrëveshjes PRESPA, e cila shtron udhën e integrimit të Maqedonisë drejt NATO-s dhe Bashkimit Evropian.
Gjithashtu në këtë takim është diskutuar edhe për qëllimin e përbashkët për ngritjen e modelit “one stop-shop” në kufirin e përbashkët, një model të cilin Shqipëria e ka aplikuar tashmë me Malin e Zi dhe Kosovën, ndërsa Maqedonia e ka në fuqi me Serbinë.
Të dy ministrat nënvizuan rëndësinë e modelit “one- stop-shop” në kufi, për shkak se ky lehtëson së tepërmi lëvizjen e shtetasve dhe mallrave mes dy vendeve.
Ndërkohë të dy homologët janë zotuar të ndërmarrin hapat e nevojshëm për të vendosur këto pika të përbashkëta kufitare në datë 1 prill 2019.
Ndërsa nga ana tjetër ministri maqedonas informoi palën shqiptare se autoritetet maqedonase po marrin të gjitha masat e nevojshme për të përmirësuar kushtet dhe infrastrukturën e pikës së përbashkët ndërkufitare të Trebishtit.
