Dy gjimnazistë janë arrestuar nga Komisariati nr. 5 në Tiranë, pas një konflikti mes nxënësve në Kamëz, ku si pasojë mbetën të plagosur tre të mitur.
Dy të arrestuarit dhe tre të plagosurit mësojnë në gjimnazin “Ibrahim Rugova”. Burimet bëjnë me dije se konflikti mes nxënësve kishte nisur disa ditë më parë me një debat verbal.
Të enjten, gjatë pushimit të madh, të miturit kanë dalë nga ambientet e shkollës, edhe pse nuk lejohet, dhe janë përfshirë në një përplasje fizike në një rrugicë pranë një parkingu, përballë shkollës.
Në sherr dyshohet se janë përfshirë të paktën shtatë persona. Policia ka arrestuar dy prej tyre, mes tyre edhe një 16-vjeçar i akuzuar për plagosjen me thikë të tre bashkëmoshatarëve të tij.
Ende nuk është përcaktuar nëse arma e ftohtë është futur në ambientet e shkollës apo është mbajtur e fshehur jashtë saj.
Autori i dyshuar nuk ka qenë bashkëpunues me hetuesit, duke mos dhënë detaje mbi rrethanat e konfliktit apo mbi vendin ku mbante thikën.
Dy prej të plagosurve kanë lënë Spitalin e Traumës që ditën e ngjarjes, pasi kishin plagë të lehta. I mituri tjetër ndodhet ende në spital, pasi ka marrë plagë më të rënda që kanë prekur organet jetike. Mjekët konfirmojnë se gjendja e tij është e stabilizuar./vizionplus.tv
