Kryeministri Edi Rama përdori fjalët e Kancelares së Gjermanisë, Angela Merkel për të sensibilizua shqiptarët për ruajtjen nga koronavirusi. Rama postoi në “Facebook një video-mesazh të Merkel e cila e shqetësuar shprehet se rastet e reja po rriten ndjeshëm. Sipas saj, sot pandemia po përhapet më shpejt se në muajt e fillimit. Sipër videos, Edi Rama shkruan: “Ju lutem, dëgjojeni kancelaren Angela Merkel”.
“Numri i infeksioneve të reja rritet me hapa të mëdhenj çdo ditë. Pandemia po përhapet me shpejtësi përsëri, më shpejt sesa në fillim, më shumë se në gjysmën e parë të vitit. Stina e verës relativisht e relaksuar ka mbaruar, tani po përballemi me muaj të vështirë. Se si do jetë dimri, si do të jenë Krishtlindjet tona, do të vendoset në ditët dhe javët në vijim. Ne të gjithë do e vendosim këtë përmes veprimeve tona. Çdo ditë ka rëndësi tani.”
Angela Merkel rendit në video edhe disa rregulla që duhet të zbatojë çdo qytetar, që kurba e infeksioneve të bjerë sërish.
“Për këtë, personat e kontaktit të çdo personi të infektuar duhet të njoftohen, në mënyrë që të ndërpresin zinxhirin e infeksionit. Autoritetet shëndetësore po bëjnë gjëra të mëdha, por kur numri i njerëzve të infektuar është shumë i lartë, ata nuk do të mund të vazhdojnë më. Pra, çfarë mund të bëjë secili prej nesh për të ulur numrat? Mund të bëjë shumë, thjesht sepse secili prej nesh vazhdimisht të mbajë distancë minimale, të mbajë mbrojtjen e gojës dhe hundës, të ndjekë rregullat e higjienës. Nëse secili prej nesh zvogëlon ndjeshëm takimet e tij jashtë familjes, atëherë prirja e infeksioneve gjithmonë e më shumë mund të ndalet. Kjo është thirrja ime për ju sot, takoni sa më pak njerëz, qoftë jashtë apo në shtëpi. Përmbahuni nga çdo udhëtim që nuk është vërtet i nevojshëm.”
