Ndërsa festa për armëpushimin mes Izraelit dhe Hamasit ka nisur që prej mbrëmjes së djeshme, kabineti i luftës së Izraelit dhe kryeministri Netanjahu ende po mbajnë pezull fjalën e fundit për marrëveshjen.
Zyra e Netanjahut tha se kabineti nuk do të mblidhet për të miratuar marrëveshjen e armëpushimit pasi sipas saj, Hamasi ka refuzuar disa pika në përpjekje për të fituar disa lëshime të fundit përpara finalizimit.
Por, në përgjigje të këtyre pretendimeve zyrtarë të Hamasit kanë folur për mediat duke thënë se grupi militant mbetet i përkushtuar ndaj propozimit dhe shpalljes së bërë nga ndërmjetësit të mërkurën.
Netanjahu është përballur me trysni të madhe brenda vendit për të kthyer në shtëpi dhjetëra pengje që po mbahen në Gazë sa më shpejt, por nga ana tjetër partnerët e ekstremit të djathtë në koalicionin e tij kanë kërcënuar se do ta rrëzojnë qeverinë e tij, nëse ai bën më shumë lëshime.
Ndërkohë, megjithë zhvillimet e fundit ushtria izraelite nuk i ka ndalur sulmet në Gaza.
Autoritetet palestineze thanë se nga bombardimet e kësaj të enjte janë vrarë rreth 50 persona. Raportime të tjera tregojnë për arrestime të shumta nga policia izraelite edhe në Bregun Perëndimor.
