Presidenti i Partisë së Lirisë, Ilir Meta, ka reaguar pas vendimit të Gjykatës së Posaçme Kundër Korrupsionit dhe Krimit të Organizuar (GJKKO), e cila refuzoi kërkesën e tij për ndryshimin e masës së sigurisë nga “arrest në burg” në një më të lehtë.
Përmes një postimi në rrjetin social Facebook, Meta e cilëson vendimin si një farsë të orkestruar politikisht dhe paralajmëron se do ta çojë çështjen në Gjykatën Evropiane për të Drejtat e Njeriut në Strasburg.
“Ne do ta çmontojmë këtë farsë hap pas hapi dhe do ta shpartallojmë në Gjykatën e Strasburgut, por edhe në debatin publik,” – shkruan Meta në reagimin e tij.
Ish-presidenti akuzon drejtësinë shqiptare se vepron nën ndikimin e politikës, duke pretenduar se akuza ndaj tij është e formuluar nga tribunat e mazhorancës.
Meta njoftoi gjithashtu se:
Sot në orën 17:30, Sekretari i Përgjithshëm i Partisë së Lirisë, Tedi Blushi, do të prezantojë argumentet kryesore kundër akuzës;
Ndërsa nesër, në orën 11:00, do të mbahet një konferencë për media live përmes telefonit të zotit Blushi, ku gazetarët do të kenë mundësi të bëjnë pyetje drejtpërdrejt.
Në fund të mesazhit të tij, Meta thekson se “nuk ka fuqi që mund të mbyllë të vërtetat e Ilir Metës dhe kauzat e Partisë së Lirisë”, duke e konsideruar këtë proces si një betejë politike dhe ligjore që do ta vazhdojë në të gjitha frontet.
/vizionplus.tv
