Ish-kryeministri italian, Romano Prodi, ka kërkuar ndjesë pas një incidenti të ndodhur gjatë prezantimit të librit të tij, ku ai shfaqej duke tërhequr flokët e gazetares Lavinia Orefici. Pas këtij veprimi, Prodi ka shprehur keqardhje dhe ka theksuar se e kishte bërë atë veprim mekanikisht, në një kontekst tjetër, duke pranuar se ka gabuar dhe se është i gatshëm të reflektojë mbi ngjarjen.
Prodi ka deklaruar se ky incident i jep mundësinë për një reflektim më të thellë, duke nënvizuar se çdo individ ka të drejtën të mbrojë dinjitetin e tij dhe të mos pranojë tallje, sidomos në kohën e internetit, ku gjithçka mund të keqinterpretohet.
Incidenti ndodhi të shtunën, kur gazetarja Lavinia Orefici kërkoi një koment nga Prodi mbi një pasazh të Manifestit të Ventotenes, që lidhej me pronën private. Pyetja e saj e shqetësoi ish-Presidentin e Komisionit Evropian, i cili më pas u pa në një video duke tërhequr flokët e gazetares, një veprim që shkaktoi një reagim të fortë nga Orefici.
Gazetarja ka thënë se u ndje e poshtëruar dhe e frikësuar nga sjellja e Prodit, duke e cilësuar veprimin si tronditës dhe agresiv.
Romano Prodi ka qenë President i Komisionit Evropian nga viti 1999 deri në 2004 dhe ka shërbyer dy herë si kryeministër i Italisë, nga viti 1996 në 1998 dhe nga 2006 në 2008.
