Vetëm një ditë pasi Komisioni Qendror i Zgjedhjeve në Kosovë nuk certifikoi listën e kandidatëve për deputetë të Lëvizjes Vetëvendosje, Aleancës për Ardhmërinë e Kosovës dhe Nismës socialdemokrate, kryeministri në detyrë, Avdullah Hoti deklaroi se këto parti nuk e meritojnë pushtetin.
Në një takim të LDK-së në Pejë, Hoti theksoi se partia e tij do të sigurojë që këta kandidatë mos të jenë në qeveri.
AVDULLAH HOTI
KRYEMINISTËR NË KOSOVË
“Veç me atë imazh që u del para syve natën, të mundësisë për pushtet, i kanë rënë në qafë KQZ-së si institucion i pavarur e duan të çmenden, e kërcënojnë, shantazhojnë e s’lënë gjë pa bërë. S’e meritojnë të vijnë këta në pushtet. Kurrë asnjëherë. Edhe ne do të kujdesemi që këta të mos vijnë në pushtet. Kurrë nuk ka ndodhur që të mos certifikohen listat zgjedhore, dje ka ndodh për herë të parë në 20 vjetët e fundit.”
Ndërkohë në një videomesazh në facebook presidentja në detyrë , Vjosa Osmani, kritikoi Komisionin Qendror Zgjedhor duke theksuar se ai është një institucion i pavarur që nuk duhet të përfaqësojë asnjë parti politike.
VJOSA OSMANI
PRESIDENTE NE KOSOVE
“Dje u bë presion marramendës ndaj KQZ-së, të gjithë anëtarët e KQZ-së japin betim, që detyrat e tyre të jenë të paanshme, profesionale dhe të përgjegjshme. Kryetarja e KQZ-së, nuk përfaqëson asnjë parti politike, detyrë më e rëndësishme e saj, është mbrojtja e integritetit të procesit zgjedhor, e kemi detyrë që ta shpëtojmë procesin zgjedhor. Zgjedhjet duhet dhe do të mbahen me 14 shkurt. Kam kërkuar nga shtetet mike, që të ofrojnë përkrahje të tillë, por abuzimi i kësaj përkrahjeje, nuk mund të tolerohet nga askush. Jam duke punuar afër me të gjithë partnerët tanë, që vota e lirë e qytetarëve të mbrohet”
Deri me tani vetëm Aleanca për Ardhmërinë e Kosovës, NISMA Social-Demokrate dhe disa parti nga radhët e minoriteteve në Kosovë, janë ankuar në Panelin Zgjedhor për Ankesa lidhur me moscertifikimin e kandidatëve për deputetë. Afati për të dorëzuar aneksat pranë zyrës përkatëse si dhe në gjykatën supreme, përfundon më 31 janar.
