Shqiptarët përbëjnë numrin më të madh të azilkërkuesve në Holandë. Lajmi është konfirmuar nga zyrtarë të Ministrisë së Drejtësisë në këtë shtet për televizionin NOS. Sipas statistikave në dy muajt e parë të këtij viti, numri i kërkesave për azil ka arritur në 480. Por pavarësisht kësaj, i njëjti burim konfirmon se shanset per ndonjërin prej tyre janë zero. Në të njëjtën kohë, raporti i Ministrisë se Drejtësisë në Holande evidenton se krahasuar me vitin e kaluar, numri i kërkesave ka rënë nga 5 mijë në qindra. Ashtu si Gjermania, edhe Holanda e ka klasifikuar Shqipërinë si një vend të sigurt. Që nga muaji mars i vitit të kaluar, qeveria holandeze ka përshpejtuar procedurat për kthimin e personave në vendet e tyre. Për këtë është arritur dhe një marrëveshje me qeverinë shqiptare. Të gjithë shtetasve shqiptare që pranojnë vullnetarisht të kthehen u paguhet bileta e avionit dhe u jepen 200 euro.