Përmes një aksioni të ndërmarrë ditët e fundit në juglindje të vendit, tregtarët ambulantë që shisnin produktet bujqësore në anë të rrugës nacionale Korçë-Pogradec janë larguar. Sipas autoriteteve, prania e tyre pranë aksit kombëtar përbën rrezik për aksidente dhe cenon sigurinë rrugore.
Por Muharrem Shkëmbi, i cili prej më shumë se 10 vitesh siguron të ardhurat familjare nga shitja e produkteve të tij, thotë se fermerëve u është ndaluar tregtimi edhe brenda ambienteve të pronave të tyre, duke i lënë pa burim të ardhurash.
“Po bëj 10 vite që shes këtu në truallin tim, në tokën time. Me këtë punë hamë 8 veta, djali me 4 fëmijë, burrë grua e dy pleqtë. Me mallin që prodhojmë, me atë rrojmë. Do i hedhim tani, pa bukë. Zgjidhja është të shes brenda rregullave, vetëm të shes. Ata thonë mos shit as në shtëpi. Hajde merre dhe shtëpinë e të dal në rrugë. Unë do shes e burg e gjobë, se e kam mallin tim. Nuk po shes drogë. Me leje, me licencë, me NIPT. Bashkia erdhi dhe më thanë e ke false. Po mire, paratë pse i paguaja kur ishte false”, tha fermeri.
Një tjetër problem lidhet me një hapësirë të ndërtuar vite më parë me qëllim krijimin e një tregu për fermerët e zonës së Bashkisë Maliq, por që nuk ka funksionuar asnjëherë për këtë qëllim.
“Me qëllim për treg, nuk ka funksionuar asnjëherë. Sot 2026, ka 24 vite që ne jemi pronarë të tokës, jemi një grup. 20 vite pastaj nuk funksionon më kontrata. Kjo bëhet e përbashkët, nuk varet vetëm nga ne. Duhet të vihet në eficence. Nuk ka patur asnjë interes nga strukturat e tjera. Ne na intereson sepse realisht po humbasim shumë. Ne jemi dakord të vihet në eficence, por nuk është vënë”, thotë Tefik Meçollari.
Sipas të dhënave, janë mbi 50 tregtarë ambulantë që tregtojnë përgjatë rrugës nacionale Korçë-Pogradec, ndërkohë që ende mungon një treg i dedikuar për shitjen e produkteve të tyre.
