Në intervalin e viteve 2009-2024, çdo vit zgjedhor ka përkuar me një nisëm të faljes fiskale apo amnisti.
Qendra Altax ka evidentuar se janë pesë masa të tilla thuajse çdo vit, sa herë ka zgjedhje, ku përfitues janë bizneset, qytetarët dhe kompanitë publike.
Kreu i kësaj qendre Eduard Gjokutaj gjatë një interviste në Vizon Plus evidentoi se faljet apo amnistitë janë kthyer në rregull.
“Bashkimi Europian atje ku ne do të anëtarësohemi faljet, amnistitë i ka përjashtime, ndërsa në vendin tonë janë kthyer në rregull. Masa të tilla favorizojnë vetëm abuzuesit dhe dekurajojnë biznesin e ndershëm”, tha Gjokutaj
Por si paraqitet Shqipëria në raport me vendet e rajonit në propozimet për masa të tilla?
“Mes vendeve të rajonit Shqipëria renditet e para në listë me 5 masa të tilla, e ndjekur nga Serbia me 4 masa ligjore. Vendet e tjera të rajonit janë më konservatore në këtë drejtim. Ndërkohë në rajon Shqipëria dhe Serbia janë dy vende me risk të lartë për pastrim parash dhe për ekonomi informale”, sqaroi Gjokutaj në Vizion Plus.
Por edhe pse ndër vite kemi patur ligje për falje fiskale, borxhi i pambledhur në administratën tatimore ka njohur vetëm rritje.
“Kjo situatë tregon se nëse do ta konsiderojmë administratën tatimore një kompani publike, ajo punon me humbje. Kjo vjen edhe për mungesë meritokracie, por edhe për përdorim politik të gjobave dhe penaliteteve që shpesh herë rëndojnë bizneset të cilët përpiqen të gjejnë rrugë për të mos i paguar”, përfundoi Gjokutaj
Deri më tani nuk ka gjetur zbatim një amnisti e mirëfilltë fiskale me legalizim asetesh, pasi një nisëm e tillë edhe pse e propozuar nga qeveria, nuk ka gjetur miratim nga strukturat e Bashkimit Europian.
/vizionplus.tv
