Anëtarë të mafies shqiptare qëndrojnë pas dy armëve që janë gjetur të fshehura brenda burgut të Korydallos.
Një prej armëve u gjet në fillim të muajit, ndërsa një tjetër, një pistoletë e markës Sig Sauer 9 m, u gjet të dielën.
Sipas një informacioni zyrtar të EL.AS., arma si dhe 15 fishekë, të gjithë të mbështjellë me shirit izolues, u gjetën të fshehura në bodrumin e burgut.
Në zonën ku u gjet arma, përveç oficerëve të burgut, kanë akses edhe të burgosurit, të cilët kryejnë punë brenda burgut.
Operacioni në burg vjen si vazhdimësi e një operacioni policor të zhvilluar brenda institucionit të vuajtjes së dënimit majin e kaluar.
Oficerët e Sigurimit kishte marrë informacion për ekzistencën e dy armëve në magazina, brenda burgut.
Oficerët korrektues kryen një kontroll në një qeli në ndërtim, e cila ishte bosh që nga viti 2023.
Duke përdorur një detektor metali ata kishin gjetur një pistoletë Glock dhe 19 fishekë të fshehura në mur.
Ndonëse në informacionet fillestare që kishin mbërritur në polici flitej për dy armë të fshehura brenda burgut, policia më pas nuk kishte mundur të gjente pistoletën e dytë, shkruan Vizion Plus.tv.
Pas informacioneve të reja që kanë mbërritur në Drejtorinë e Krimit të Organizuar (DAOE), të dielën është kryer një bastisje dhe hetim i ri, me rezultate pozitive këtë herë.
Gjetjet specifike vetëm ngrenë pikëpyetje për nivelin e sigurisë së burgjeve. Si përfunduan dy pistoleta dhe mbi 30 plumba brenda burgut më të madh të vendit? Kush ishte personi që i kishte marrë armët dhe cili ishte qëllimi i tij?
Ndonëse aktualisht nuk ka përgjigje të qarta, drejtuesit e EL.AS. kanë informacione që i lidhin këto gjetje me anëtarë të mafies shqiptare, të cilët janë duke vuajtur dënimin me burgim të përjetshëm.
Oficerët kompetentë besojnë se armët do të përdoreshin për tu arratisur duke marrë pengje brenda burgut.
Një plan i ngjashëm u zbulua në vitin 2020 në burgjet e Korfuzit. Në atë kohë, oficerët e policisë kishin bastisur burgun dhe kishin gjetur të fshehura brenda murit, në një ambient të përbashkët të burgut, dy pistoleta, njëra me silenciator.
Nga hetimet e mëtejshme u zbulua se 8 të burgosur po planifikonin të arratiseshin duke marrë peng punonjësit e burgut.
Në atë kohë, kriminelët shqiptarë që vuanin dënime me burgim afatgjatë konsideroheshin si drejtues të planit.
Vlerësohet se një plan i ngjashëm synohej të zbatohej nga kriminelët që qëndrojnë pas futjes dhe fshehjes së dy pistoletave këtë herë në burgun famëkeq të Korydallos./vizionplus.tv
