Emocione, rivalitet dhe shumë tension. Gjithçka ndodhi në finalen e kupës së Shqipërisë në basketboll për femra. Flamurtari fitoi trofeun duke mundur Partizanin në fund të një takimi që ishte një garë shumë e fortë sportive dhe jo vetëm.
Vajzat vlonjate e mposhtën Partizanin 80 me 79 përmes një koshi shënuar në ekstrem, një kosh vendimtar që për vajzat nga kryeqyteti u realizua pasi koha e rregullt kishte përfunduar, ndaj mes zhgënjimit dhe pakënaqësisë ato nuk morën pjesën në ceremoninë e ndarjes së medaljeve.
Duke iu rikthyer kronikës së takimit të luajtur në pallatin e sportit “Flamurtari”, duhet thënë se Partizani luajti më mirë në dy periodat e para duke fituar 42 me 36.
Mirëpo vlonjatet nisen kthesën duke ekuilibruar shifrat në përfundim të periodës së trete 61 me 61.
Në 30 sekondat e fundit vajzat kryeqytetase shënuan një kosh për tre pikë që i kaloi në avantazh 79 me 78, mirëpo në frymën e fundit ishte Memushi që shënoi dy pikët vendimtarë duke i dhënë mundësi Flamurtarit të ngrejë lart trofeun e parë për këtë vit dhënë nga presidenti i federatës Avni Ponari.
“Ishte një nga finalet më emocionuese që kam luajtur. Mendoj se publiku ishte i gjerë, dua ta falenderoj sepse entuziazmi i tyre na shërbeu. Shpresoj të jenë kënaqur të gjithë siç e patëm premtuar, kupa mbeti në Vlorë”, tha Tea Memushi.
Edhe një vit më parë Flamurtari mundi Partizanin në finale e kupës me të njëjtën diference një pikë.
Vajzat vlonjatë janë gjitahshtu kampione në fuqi të vendit duke pasur edhe në këtë sezon sërish Partizanin rivalin e madh për të fituar kampionatin kombëtar.
