Një fëmijë i mitur ka humbur jetën këtë të enjte në qytetin e Korçës. Ngjarja ka ndodhur pak pas orës 16.00 të pasdites, kur fëmija i moshës rreth 8 vjeç ka gjetur vdekjen duke u mbytur në liqenin e parkut japonez.
Ende nuk dihet se cilat janë rrethanat e ngjarjes, por dëshmitarët okularë në vendngjarje thanë se viktima ka qenë i shoqëruar edhe nga një fëmijë tjetër pak më i rritur.
Gjithashtu nuk dihet nëse fëmija është rrëzuar vetë në liqenin e vogël të parkut japonez, apo është shtyrë gjatë lojës me fëmijën tjetër, por ai pas rrëzimit në ujë nuk ka mundur dot të dalë duke gjetur vdekjen.
Mendohet se viktima është banues në periferi të qytetit të Korçës, në afërsi të fabrikës së duhanit, por ende nuk është bërë i mundur identifikimi i plotë i tij.
Kanë qenë kalimtarë të rastit ata që kanë njoftuar policinë, e cila ka mbërritur menjëherë në vendngjarje ku së bashku me specialistët e zjarrfikëses kanë bërë të mundur nxjerrjen e trupit të pajetë, i cili është dërguar më pas në morgun e spitalit për kryerjen e ekspertizës dhe vlerësimin e rrethanave të ngjarjes.
Liqeni i vogël i ndërtuar kohët e fundit si pjesë e parkut japonez, ka një thellësi prej rreth 2 m, ndërsa nuk ka asnjë lloj rrethimi apo masë sigurie rrotull tij.
