Policia e Shkodrës ka arrestuar në flagrancë dy shtetas, të cilët u kapën me lëndë narkotike të dyshuar kanabis dhe një mjet prerës (thikë) gjatë një kontrolli rutinë në automjetin me të cilin po udhëtonin.
Sipas njoftimit zyrtar, shërbimet e Komisariatit të Policisë Shkodër, në bazë të informacioneve të siguruara në rrugë operative, kanë ndaluar për kontroll automjetin ku ndodheshin shtetasit Armand Papaj 35 vjeç, banues në fshatin Dragoç, dhe Sokol Fushani 39 vjeç, banues në Shkodër.
Gjatë kontrollit të mjetit dhe të dy personave, policia gjeti dhe sekuestroi një sasi lënde narkotike kanabis, që dyshohet se do të shpërndahej në doza për shitje, si dhe një thikë, që përbën armë të ftohtë.
Po ashtu, u sekuestruan automjeti dhe 2 telefona celularë që shërbenin për komunikim gjatë veprimtarisë së tyre.
Në përfundim të veprimeve procedurale, specialistët e Sektorit për Hetimin e Narkotikëve arrestuan në flagrancë të dy shtetasit.
Materialet hetimore janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme ligjore, për veprat penale:
“Prodhimi dhe shitja e narkotikëve” dhe “Prodhimi, mbajtja, blerja apo shitja pa leje e armëve të ftohta”.
Policia e Shkodrës njofton se kontrollet do të vijojnë intensivisht, me qëllim evidentimin dhe goditjen e çdo veprimtarie të paligjshme që lidhet me trafikun e drogës dhe armëve.
/vizionplus.tv
