Shërbimet e Drejtorisë Vendore të Policisë Lezhë zhvilluan kontrolle intensive kundër armëmbajtjes pa leje, duke goditur një tjetër rast në këtë fushë përmes operacionit policor të koduar “Gjerdani”.
Gjatë operacionit u ndalua në fshatin Shënkoll, një 30-vjeçar, Kristian Buzatu, banues në Lezhë, i cili lëvizte i armatosur dhe me një automjet pa targa. Gjatë kontrollit iu gjet në çantë një armë zjarri pistoletë me municion luftarak, që mbante pa leje.
Në automjet ndodheshin edhe dy pasagjerë, Admir Alija, 30 vjeç, banues në Durrës, dhe Klisman Ndou, 25 vjeç, banues në fshatin Tale, të cilët u proceduan penalisht për veprën “Moskallëzimi i krimit”.
Gjatë operacionit u sekuestruan gjithashtu automjeti, arma, municioni, dy celularë dhe një shumë parash. Materialet procedurale iu referuan Prokurorisë së Lezhës për veprime të mëtejshme.
Policia nënvizon rëndësinë e veprimeve të menjëhershme operative për parandalimin e krimeve me armë dhe ruajtjen e sigurisë në komunitet.
/vizionplus.tv
