Disa persona janë arrestuar këtë të martë në qarkun e Beratit.
Në një njoftim për mediat, policia bën me dije se forcat “Shqiponja” kanë vënë në pranga shtetasin D. Xh., 41 vjeç, banues në Kuçovë, pasi gjatë kontrollit në automjetin që drejtonte, iu gjet një sasi Kokaine, e cila u sekuestrua me cilësinë e provës materiale.
Ndërsa specialistët e Sektorit për Qarkullimin Rrugor kapën dhe vunë në pranga shtetasin A. D., 31 vjeç, banues në Fier, pasi në aksin rrugor “Berat-Belsh”, me automjetin që drejtonte, ka përplasur 2 automjete dhe është larguar nga vendi i aksidentit. Si pasojë e përplasjeve pati vetëm dëme materiale. Më tej, në momentin e ndalimit, shtetasi A. D. ka kundërshtuar me dhunë, punonjësit e Policisë.
Ndërsa policia e Beratit ka arrestuar në flagrancë shtetasin E. D., 41 vjeç, pasi ka ushtruar dhunë ndaj bashkëshortes së tij. Më tej, gjatë kontrollit në banesë, iu gjetën dhe iu sekuestruan me cilësinë e provës materiale, 1 armë gjahu dhe 17 fishekë, që i mbante pa leje.
Ndërsa specialistët e Seksionit për Hetimin e Krimeve të Stacionit të Policisë Dimal arrestuan në flagrancë shtetasin E. N., 43 vjeç, pasi dyshohet se ka ushtruar dhunë ndaj bashkëshortes dhe vajzës së tyre të mitur.
Materialet procedurale iu referuan Prokurorisë së Beratit, për veprime të mëtejshme./vizionplus.tv
