Ambasada e Shteteve të Bashkuara të Amerikës reagoi pas miratimit të ndryshimeve kushtetuese në Parlament. Ambasada u shpreh e keqardhur që për këto ndryshime nuk pati konsesus nga të gjitha palët politike.

“Më 23 korrik, Parlamenti miratoi legjislacionin për të kodifikuar marrëveshjen e 5 qershorit për reformën zgjedhore, e cila u arrit në një mënyrë transparente dhe gjithëpërfshirëse përmes Këshillit Politik. Sot, Parlamenti miratoi ndryshime në Kushtetutë që do të mundësojnë masa shtesë për reformën zgjedhore. Ndërsa ky veprim ishte në kompetencën e Parlamentit, është për të ardhur keq që nuk u mor në të njëjtin frymë me të cilën u arrit marrëveshja e 5 qershorit.”

Selia diplomatike i kujtoi shumicës qeverisëse se tani është koha për të mbajtur fjalën për vijimin e dialogut në Këshillin Politik.

“Ne i kujtojmë shumicës deklaratat e saj se, megjithë miratimin e sotëm në Parlament, ata synojnë të angazhohen me të gjithë partitë në Këshillin Politik, në mirëbesim dhe me qëllimin për të arritur në marrëveshje për zbatimin e legjislacionit mbi listat e hapura dhe koalicionet. Ne e kuptojmë zhgënjimin e Opozitës së Bashkuar, ndërsa mirëpresim vendosmërinë e tyre për të mbetur të angazhuar në institucione dhe procese demokratike, përfshirë Këshillin Politik, në mënyrë që të dëgjohen zërat e të gjithë shqiptarëve. Përsërisim, se ne do të shohim nëse drejtuesit do ta mbajnë fjalën e tyre. Ashtu siç vepruan në arritjen e marrëveshjes së 5 qershorit, udhëheqësit shqiptarë duhet të tregojnë gatishmërinë dhe aftësinë e tyre për të negociuar marrëveshje që vënë në radhë të parë interesat më të mira të popullit shqiptar.”

Kjo kujtesë erdhi në kundërpërgjigje të deklaratave të kryeministrit Edi Rama, i cili në fjalën që mbajti në Parlament tha se nuk është i kënaqur kur sheh ambasadoren amerikane që flet për ndryshimet kushtetuese.

Leave a Reply

Your email address will not be published. Required fields are marked *