Të paktën 161 persona rezultojnë ende të zhdukur në një qark të Teksasit, katër ditë pasi përmbytjet vdekjeprurëse dhe shkatërruese goditën disa pjesë të shtetit, tha guvernatori Greg Abbott, ndërsa shpresat për gjetjen e të mbijetuarve po shuhen.
Të paktën 109 persona kanë vdekur pas përmbytjeve, 94 pret të cilëve vetëm në zonën e Kerrville, tha Abbott në një konferencë për shtyp të martën.
Në Teksas, përpjekjet të kërkim-shpëtimit vazhdojnë. Abbott u zotua se ekipet e emergjencës “nuk do të ndalen derisa të gjendet çdo person i zhdukur”.
Ekipet e ndihmës nga agjenci të ndryshme po punojnë së bashku në përpjekjet e shpëtimit, përfshirë agjentë nga patrullimi kufitar, FBI-ja dhe Garda Kombëtare.
Një nga vullnetarët e shpëtimit, i quajtur Tim, i tha BBC-së se nuk kishte parë kurrë më parë ndonjë shkatërrim të kësaj shkalle.
“Kam përjetuar përmbytjet në Teksasin Lindor dhe Teksasin Juglindor, si dhe uraganet, por kjo është një makth”, tha ai.
Ekspertët thonë se ka pasur një numër faktorësh që kontribuan në tragjedinë në Teksas, duke përfshirë motin ekstrem, vendndodhjen e shtëpive të pushimit dhe kohën.
Guvernatori, i cili kishte kaluar një pjesë të ditës duke vëzhguar zonën e përmbytjes, tha se autoritetet kishin lëshuar një paralajmërim për stuhi dhe ishin në dijeni të një përmbytjeje të mundshme, por “nuk e dinin madhësinë e stuhisë”.
Shumica e viktimave vdiqën në Qarkun Kerr, ku lumi Guadalupe u fry nga shirat e rrëmbyeshëm para agimit të së premtes, festës zyrtare të 4 korrikut./vizionplus.tv
