Më shume se 150 shqiptarë nuk janë lejuar mëngjesin e sotëm të kalojnë në Maqedoninë e Veriut ku punojnë çdo ditë në vendin fqinj.
Bëhet fjalë për banorë kryesisht të fshatrave të Pogradecit, Prrenjasit e Librazhdit të cilët në pamundësi punësimi në qytetet e tyre, çdo ditë shkojnë në vendin fqinj për të gjetur një mundësi punësimi.
Pjesa më e madhe e tyre nisen në orët e para të mëngjesit dhe kthehen në shtëpitë e tyre në orët e vona të darkës.
Mirëpo ditën e sotme policia maqedonase ka urdhëruar policinë shqiptare të moslejojë daljen e tyre nga Shqipëria në drejtim të Maqedonisë së Veriut.
Burime të siguruara thanë se 3 ditë më parë një shqiptar emri i të cilit nuk bëhet me dije ka gjetur vdekjen aksidentalisht në një pyll ku ka qënë duke bërë një punë ditore.
Nga ana e Drejtorisë Vendore të Policisë së Kufirit dhe Emigracionit bëhet me dije se nga ana e homologëve maqedonas është thënë se “Janë kthyer nga pala maqedonase, me motivacionin se nuk justifikojnë qëllimin e udhëtimit. Dhe dyshohen për punësim të paligjshëm”.
Ditën e sotme përfaqësues të stacionit kufitar të Qafë Thanës kanë pasur një takim me palën maqedonase ku mes të tjerave kanë diskutuar edhe për problemin e shqiptarëve të cilët nuk janë lejuar ditën e sotme të kalojnë kufirin. Nga ana e policisë sonë kufitare nuk janë bërë me dije detaje të kësaj bisedë por burimet e siguruara thanë se për puntorët sezonalë do të kërkohet edhe miratimi i punëdhënësve. Me qëllim shmangien e punës së zezë ditore nga ana e shqiptarëve.