Presidenti rus Vladimir Putin zhvilloi një telefonatë me homologun e tij turk Tajip Erdogan. Lajmi u bë i ditur nga Kremlini këtë të shtunë. Fokusi i bisedës raportohet se ishte marrëveshja për drithërat.
“Erdogan falënderoi Putinin për qëndrimin e tij pozitiv në zgjatjen e marrëveshjes së grurit të Detit të Zi dhe shprehu mirëkuptimin e qëndrimit parimor të palës ruse për të arritur zbatimin e plotë të pjesës së dytë të marrëveshjes, duke hequr barrierat për produktet bujqësore të Rusisë”, thuhet në një deklaratë.
Rusia parashtroi kushtet të hënën për të rënë dakord për çdo zgjatje të mëtejshme të marrëveshjes së drithit të Detit të Zi.
Putin tha se Moska mund të dërgonte grurë falas në vendet afrikane nëse këto kushte nuk plotësoheshin.
“Putin dhe Ergodan shprehën kënaqësinë për dinamikën pozitive të marrëdhënieve tregtare dhe ekonomike, zbatimin e suksesshëm të projekteve të përbashkëta strategjike në sektorin e energjisë, duke përfshirë furnizimin me gaz dhe ndërtimin e termocentralit bërthamor Akkuyu në Turqi”, tha Kremlini.
Sipas mediave ndërkombëtare ata diskutuan gjithashtu normalizimin e marrëdhënieve turko-siriane.
