Pas më shumë se 8 orësh e bllokuar, Rruga e Arbrit është hapur për qarkullimin e automjeteve. Dhjetëra makina u lanë në rrugë, pasi e patën të pamundur të lëvizin në drejtim të Dibrës dhe në drejtim të Tiranës.
Qarkullimi u hap rreth orës 23:00 të mbrëmjes së të hënës, duke bërë të mundur që një pjesë e automjeteve të lëviznin. Ndërkohë, aktualisht Njësia Lurë në Dibër mbetet e bllokuar për shkak të borës, si edhe disa fshatra të tjerë të thellë malorë. Probleme ka gjithashtu me energjinë elektrike si pasojë e dëmtimit të rrjetit.
Pa energji elektrike, prej 24 orësh ka mbetur edhe zona turistike e Thethit. Banorët atje apelojnë përmes Vizion Plus që të merren masa, pasi temperaturat e ulëta dhe reshjet e dëborës e kanë vështirësuar situatën.
Edhe fshatrat e njësisë administrative Vithkuq në bashkinë e Korçës, Dardhas në bashkinë e Pogradecit, si dhe disa fshatra të njësisë administrative të Gorës në bashkinë e Maliqit, kanë mbetur pa energji elektrike.
Ulja e temperaturave ka sjellë probleme në qarkullimin e mjeteve në këto zona. Për këtë arsye, autoritetet u kërkojnë drejtuesve të mjeteve të përdorin zinxhirë, pasi në shumë vende akset malore kanë prani akulli.
Kalimi në rrugët e fshatrave turistikë të Voskopojës, Dardhës dhe Boboshticës bëhet pa probleme, por drejtuesit e mjeteve duhet të përdorin gomat e dimrit për të shmangur vështirësitë në qarkullim. /vizionplus.tv
