Aldo Bumci doli nga selia e PD për të reaguar mbi daljen e disa përgjimeve ku kryeministri Zoran Zaev fliste në telefon me Poroshenkon e “rremë” mbi ndryshimin e mundshëm të kufijve mes Kosovës dhe Serbisë.
Bumci tha në një deklaratë për mediat se kryeministri i Maqedonisë së Veriut, Zoran Zaev pohoi dhe një herë që projekti për ndarjen e Kosovës është i vërtetë, ndryshe nga sa ka deklaruar në mediat kryeministri shqiptar Edi Rama.
Kryeministri i Maqedonisë së Veriut, Zoran Zaev pohon dhe një herë që projekti për ndarjen e Kosovës është i vërtetë, dhe ndryshe nga çfarë është përpjekur ta paraqes Edi Rama në fakt ky është një projekt serb që i shërben interesave serbe dhe ruse, dhe qarqeve të caktuara që janë të interesuara për çdo lloj skenari ogurzi duke cenuar rëndë interesat e Kosovës.
Bumci e quan tradhëti kombëtarë qëndrimin e Ramës, I cili sipas ish deputetit demokrat nuk është distancuar nga ideja për ndryshimin e kufijve mes Kosovës dhe Serbisë.
Kjo është tradhti e lartë ndaj interesave kombëtare dhe mos distancimi për asnjë moment i Edi Ramës nga ky projekt, dhe me keq akoma vazhdimi i mbështetjes së këtij projekti me deklarata dhe forma të tjera edhe pas Samitit të Berlinit tregon që Rama dhe bashkëpunëtorët e tij vazhdojnë me këmbëngulje në këtë drejtim.Ky është një lajm ogurzi për Kosovën, Shqipërinë dhe të gjithë shqiptarët në rajon, që tregon se fatet e kombit janë në duart e një grupi njerëzish të papërgjegjshëm që për interesat dhe pushtetin e tyre personal janë gati të tregtojnë dhe të zhbëjnë arritjet historike që kanë ardhur nga sakrifica sublime.
Partia Demokratike, tha Bumci, i bën thirrje shqiptarëve dhe partnerëve tanë strategjikë SHBA dhe BE që të mos lejojnë zbatimin e këtij projekti anti-europian dhe anti-NATO që është kundër paqes, stabilitetit dhe bashkëjetesës në rajon dhe më gjerë.
