Kreu i Prokurorisë së Posaçme kundër Korrupsionit dhe Krimit të Organizuar, Altin Dumani ka zhvilluar mesditën e kësaj të hëne një takim me gazetarët. Kreu i SPAK ka folur për çështje të ndryshme të cilat kanë interes për publikun.
Sa i përket “21 janarit”, Dumani ka theksuar se lidhur me këtë dosje çdo ditë janë duke u kryer veprime konkrete, pasi e tillë është dhe dinamika e cila ka nevojë për veprime të përditshme.
Dumani: Vendimi nga Gjykata e Lartë është marrë në mars të 2024 dhe aktet në SPAK kanë mbërritur në 11 korrik, në datën 15 korrik është bërë regjistrimi i porcedimit penal pa emra konkret. Çdo ditë për këtë çështje kryhen veprime konkrete pasi e tillë është dinamika, që sjell nevojën për veprime të përditshme.
Ndër të tjera ai foli edhe për zgjedhjet dhe strukturën që do të hetojë ndërhyrjen në këtë proces. Dumani tha se e kanë gati strategjinë dhe planin e veprimit, mirëpo nuk ka dashur të japë më tepër detaje.
Dumani: Kam deklaruar që do të publikoj strategjinë e hetimit të krimeve zgjedhore, strategjia thuajse ka përfunduar, pritet miratimi po ashtu është menduar edhe një plan veprimi dhe një urdhër, por për momentin nuk mund ta bëj publik urdhrin.
Sa i përket komunikimeve në Sky Ecc, Dumani tha se nuk kanë në dispozicion të gjithë databzën e Sky Ecc. Ai theksoi se institucioni që drejton, SPAK, është i vëmendshëm që të ndajë provat nga thashethemet.
Dumani: Nuk është e vërtet që s’ka arrestime të politikanëve, pasi kemi ish-deputetin Jurgis Çyrbja të arrestuar. Ne nuk kemi në dispozicion të gjithë databazën e Sky Ecc, në vijimësi ne kërkojmë kode të tjera kur na dalin në bazë të hetimeve që kemi. Në bazë të rezultateve të deri tanishme nuk na ka dalë lidhja direkte. Ne si institucion jemi të vëmendshëm që të ndajmë provën nga thashethemi, duke u përpjekur që të jemi sa më objektiv. Tashmë kemi edhe një vendim të Gjykatës Kushtetuese në lidhje me këtë çështje, ne po presim vendimin e arsyetuar për të parë argumentat. Në përpiqemi qe të mos kemi në dispozicion vetëm komunikimet në Sky Ecc, por t’i lidhim ato edhe me prova të tjera. Ju garantoj që në momentin që konstatohet kushdo person, e kemi prova do të marrim vendimet tona./vizionplus.tv
