Zëdhënësi i Presidentit, Ilir Meta, Tedi Blushi ka reaguar në lidhje me deklaratat e bëra nga nënkryetari i PD, Edi Paloka në lidhje me përplasjet mes Presidencës dhe mazhorancës për Gjykatën Kushtetuese.
Blushi shkruan në Facebook se Meta jo vetëm që është plotësisht i ndërgjegjshëm për përgjegjësitë e tij Kushtetuese por do të jetë dhe ushtari I parë që do të mbrojë Republikën dhe Kushtetuën.
Blushi thekson gjithashtu se Meta do të jetë gjithmonë në krye të detyrës pavarësisht nëse ndodhet në zyrë apo jashtë saj.
“Lidhur me sugjerimin e z.Paloka që Parlamenti (e përsërisim qartë se ka vetëm 82 deputetë legjitimë, sipas deklaratës së qartë që ka bërë Presidenti Meta në Pogradec në 20 mars 2019), të shkarkojë Presidentin apo sugjerimi tjetër që të pushtojnë Presidencën kur Presidenti Meta të mos jetë në zyrë, u bëjmë të qartë të gjithëve: Të mos shohin ëndrra të tilla, sepse të gjithë shqiptarët e dinë se Presidenti Meta kudo që të jetë, në zyrë apo jashtë saj, do të jetë në krye të detyrës, dhe është i bindur se populli shqiptar do t’i përgjigjet ÇDO THIRRJE DHE DEKRETI TË TIJ NË MBROJTJE TË REPUBLIKËS DHE RENDIT KUSHTETUES. Sqarojmë për të gjithë shqiptarët se z.Meta, jo vetëm është plotësisht i ndërgjegjshëm për përgjegjësitë e Tij Kushtetuese, si Kryetar i Shtetit, si Komandant i Përgjithshëm i Forcave të Armatosura dhe Kryetar i Këshillit të Sigurisë Kombëtare, por mbi të gjitha ai ËSHTË DHE DO TË JETË NË RAST NEVOJE USHTARI I PARË NË MBROJTJE TË REPUBLIKËS DHE KUSHTETUTËS.”
